كثير نسمع ، عن الذئاب البشريه = قصدهم الشبـآب ,
وانهم يستغلون البنات بكل الطرق لـ يوصلون للشي الي يبونه .,
مثلا , شاب يدعي انه يحب بنت وكذا عشان يوصل لـ غرض من البنت ثم يتركهـآ
فـ صار الشاب هو الذئب البشري وانتشر الاسم بصفه عامه علينا يالشباب اننا ذئاب بشريـه ,
وان البنت : هي البنت المسكينـه
انا عندي نقاط ابي اتكلم عنهـآ
انا ماقول ان كل البنات , مساكين , ولا كلهـم مضبوطيـن
ونفس الشي بـ الشباب تحصل المسكين وتحصل النصاب ,
وراح اذكر لكـم امثله للطرفين ,
شاب . يبلغ من العمر 25 سنـه تعرف على بنـت , وادع عليها علاقه الحب وانه يحبها وكذا واستمرت علاقتـهم لين ماشافها الرجال وجلسو مع بعـض وكذا , ثم تركو بعـض .,
هنـآ نحط الغلط على ميـن ؟ على الرجال ولا البنت ؟
الكل راح يقول على الرجال لانه كذب وقال انه يحب البنت ف صار ذئب بشري ,
طيب على عيني وراسي , لاحد يستعـجل برزقـه جايكم بالطريـق
ذكرت لكم مثال عن الرجـآل ,
الحين بذكر لكم مثال عن البنـت ’
بنت عمرها عمر الزهور 24 سنـه .
تلبس لك هالعبايه المخصره ودقت لك اللثمه يطول باعماركم وراحت لها اقرب مول ,
ثم دخلت هالمول يطول باعماركم وكل مامر واحد من جنبها ناظرت فيه رمت له ضحكه ولا كلمه والرجال ماصدق وعطاها الرقم . وعلى هالموال لين تطلـع
تطلع من المول معها 20 رقم لـ شباب حلوٍ
ثم تروح تشحن بطاقه ابو 10 ,
وترسل مسج لـ هالارقام انا البنت الي كنت بالمول وعطيتني رقمك
تييت تيييت < صوت المسسج , مسك جواله الرجال وشاف المسج ودايركت دق
ردت البنت وقوه تميلح ومعليش مادقيت عليك ماعندي رصيد
الرجال = ابشر الحين اشحن لك . وقفل
ونقز الرجال للبقاله وجاب لها بطاقه وشحن لهـآ
وتكلمو لـ مده ثلاث دقايق ثم صرفته امي جات الحين بعدين اكلمك .,
وراحت لـلي بعده وعلى هالموال لين تخلص من الشباب كلهـم :
الحين البنت طلعت في فايده يمكن طلعت بـ شحن 400 ريال / 500 ريال ويمكن اكثر او اقـل
ثم يالبنت تستمر على هالشباب اذا عرفت انهم بيعطونها بطايق وشحن , او انها تسحب عليهم وتاخذ ارقام ثانيه من الشباب .
هنا وش نقول ؟
بيجيك البعض يقول , القانون لايحمي المغفليــن ,!
واذا انت خروف انا مو ذنـبــي .,!
طيب وش معنى اختلف الرد بين الشاب وبين رد البنت ,
الاول عشانه رجال صار ذئب بشري .
والثانيه عشان بنت ، صار الرد القانون لايحمي المغفلين , واذا انت خروف انا مو ذنبي ؟
طيب ليه ماينطبق المثل على الاثنين ؟
هنا نقطـه نوقف عندهــآ , عشان نتناقش ,’
شي ثانـي ,
بنت دخلت مول , وشافت لها هالرجال المسكين موظف في محل او فرع , وراحـت له واغرته والرجال راح ملح ., ثم اخذ رقممها ودق عليهـآ ومكالمات اخر الليل وكذا لين ماستقرت العلاقه , وكل هالعلاقه بقصد غرض تاخذه من الرجال ثم تسحب عليـه .
وجاء الوقت المناسب
دقت البنت على الرجال
البنت = اهلين حبيبي
الرجال هلا حبيبتي
البنت = اخبارك ياقلبي وحشتني كثير كثير
الرجال = بخير ياعيوني وانتي واحشتني اكثر اكثر
البنت = حبيبي ابي منك طلب بس منحرجه منك
الرجال = عيوني لك امريني انتي بس واعتبري طلبك موافق عليه
البنت = ابي منك شي فلاني على حسب شغله الرجال مثلا ان كان بشتغل بجوالات او اي شي كان , واعطيك حسابه نهايه الشهر
الرجال = من عيوني ياقلبي مري علي اليوم واختاري الي تبين ويفداك ياروحي .
البنت = يالبى قلبك احرجتني ياقلبي والله بس ولايهمك نهايه الشهر اردها لك
وانتهت المكالمه وراحت البنت لـ الرجال وخذت الي تبي ودحدرت لـ بيتها
وانتهينـآ لين ماتنتهي العلاقه .!
طيب الحين ليه مانقول البنت نصابه , وذئبه بشريه ؟
وهل صار في زماننا هذا الحب استغلال ؟
والعلاقات لـ غرض استغلالي ؟
وصار الاسلوب الحلو والكلام المعسول لـ هالامور الاستغلاليه فقط ؟
تشوفون الى وين وصلنا ياشباب ويابنات ,!
نستغل بعضنا البعـض لغرض مادي فقط .,!
قضيه اخرى ,
شاب يعاكس بنت , تجيه البنت تصارخ عليه وتهزئه , انت ماتستحي انت مو متربي , انت ماعندك اخوات كيف تغازلني الخخ الى الموال .!
طيب لو صار العكس ؟ البنت عاكست الشاب ؟ ليه مانقدر نهزئ البنت ؟ مثل ماتهزئ الرجال ؟
ليه مانقولها انتي ماتستحين انتي مو متربيه انتي مو محترمه انتي ماعندك اخوان الخخ الموال ؟
ولا عشان بنت ولابسه عبايه مانقدر نرفع صوتنا عليها ؟
والرجال دايم هو الغلطان .!
موش منطق ابدن , وكلام غير عقلانــي .!
وبالاخير .
احب اقول ان مو كل البنات كذا ولا كل الشباب كذا بس انتشرت هالامور بينـنـآ بكثرره , وطاحت سمعت الشاب .!
ومن باب اني من هالشباب
حبيت ابدي رايي واقول الي بخاطري . وان شاء الله اشوف نقاش وتفاعل مع البنات ,
ونشوف هل كلامي صحيح ومعقول , او كلامي خطا ؟ وليه اذا كان خـطـآ , !
الموضوع لـكم بما يحلو لكم .
قول الي بخاطرك ولايهممك احـد
ابي تفاعل لان هالموضوع ماينسكت عنـه صراحه في اشياء كثيره غلط في غلـط ,
نهايه الكلام .
المزاج
موضوع: جبتلكم موضوع عن الذئب البشري وهو الشاب هاذا الكلام مزبوط ؟؟ 
الخميس يوليو 14, 2011 6:50 pm
